Obradoiros artísticos sobre emocións a cargo do escritor Pedro Feijoo
Boa parte do traballo das persoas artistas consiste xustamente en enfrontárense ás súas propias emocións para, a través do proceso creativo, atopar a maneira de darlles forma. Ás veces trátase de manifestar aquilo que nos fai sentir viv@s. Outras, de plantarlle cara a aquilo que nos aterra. Mais sempre, sempre, comunicándonos, xa sexa con quen nos rodea ou, moi especialmente, con nós mesm@s. Sen medo. Con liberdade.
Ao longo de xa case tres décadas, Pedro Feijoo desenvolveu unha intensa carreira como creador, primeiro no campo da música e, posteriormente, no da literatura. E será precisamente de toda esa experiencia da que os e as participantes neste obradoiro se valerán para atopar o xeito de darlles forma a todas esas emocións. Tocando, escribindo, lendo ou ben compoñendo, aprenderemos a canalizalas para convertelas en algo novo. Unha creación que sexa comunicable, visible. Tanto para a xente, coma para un mesm@…
Os últimos acontecementos sociais demostraron que, máis alá da formación intelectual e física, a educación emocional é fundamental para o desenvolvemento. Ata hai pouco, a atención relacionada con competencias emocionais parecía non ser relevante, converténdose na actualidade nunha necesidade á que se enfrontan escolares, profesorado e familias.
Co obxectivo de dotar de ferramentas a xente nova que lle axuden a comprenderse mellor e comprender a súa contorna, presentamos un programa específico orientado á saúde emocional con conferencias e obradoiros.
