En Afundación, Obra Social ABANCA cumprimos 10 anos como axentes destacados na actividade cultural e social de Galicia. Como tales, entre as nosas tarefas, ao longo desta década, estivo a de ser depositarios e salvagardas dun dos Bens de Interese Cultural máis destacados da nosa comunidade, a Colección de arte, que mostramos a través de proxectos expositivos de moi variada temática e linguaxe.
Para conmemorar os 10 anos de xestión deste BIC, presentamos SIMULTÁNEA, un macro proxecto que implica a Colección como elemento dinamizador da cultura e a tradición galegas nas súas sete cidades. Todas as sedes de Afundación implícanse nesta experiencia «simultánea», unha exhibición sen precedentes en que gozar dunha boa parte das máis de 5.000 pezas que compoñen o catálogo visual e histórico que é a nosa Colección de arte.
Instalacións, fotografía, escultura, pintura… para relatar a nosa historia contemporánea baixo o prisma da arte galega desde o século XIX á actualidade.
Ademais, presentamos toda unha gama de actividades relacionadas, destacando o programa de escolares en que se combinan coñecementos de arte e historia, actividades de robótica e programación con axuda da IA (Aula STEAM) e liñas de contido asociadas á sostibilidade e a conservación.
Detrás dun retrato hai moito máis ca alguén representado, están os obxectos que o rodean ou a ausencia dos mesmos, que falan del, está o contexto que o envolve e está o rostro que é o espello da alma.
Os retratos poden ser máis ou menos íntimos, masculinos ou femininos, retratos sociais e colectivos ou retratos documentais que nos falan dun momento histórico.
Desde a nosa área educativa poñemos en marcha as seguintes actividades para escolares onde combinamos arte, programación e robótica, con creatividade e sostibilidade:
● Infantil a 4º Primaria (*) | Visita-conto con obradoiro | Seguindo a pista de Kora, a retratista (90 minutos.)
Coñecemos a Kora, considerada unha das primeiras retratistas da nosa historia. Kora vainos deixando pistas para poder coñecer os distintos tipos de retratos e cantas cousas podemos saber sobre as persoas que aí aparecen, as súas emocións e o medio que as rodea a través de importantes artistas de Galicia.
(*) Visita híbrida específica para 3º e 4º Primaria.
● 5º Primaria a 2º ESO | Visita guiada adaptada con obradoiro | Imos de cara! (2 horas.)
Por equipos investigamos a información que nos pode achegar un retrato sobre as persoas que aí aparecen. Son os retratos/selfies importantes na actualidade? Abrimos un interesante debate en que nos servirá de axuda adestrar nada máis e nada menos que unha IA.
● 3º e 4º ESO, bacharelato e CF | Visita comentada con obradoiro opcional |
Simultánea. Modo retrato, protagonistas e secundarios na Colección de Arte Afundación
(1 hora sen obradoiro. 2 horas con obradoiro)
A nosa sala de exposicións convértese na nosa aula, algún coñecemento de arte, moito contexto e historia, así coma os múltiples significados que hai detrás dos retratos.
