En Afundación, Obra Social ABANCA cumprimos 10 anos como axentes destacados na actividade cultural e social de Galicia. Como tales, entre as nosas tarefas, ao longo desta década, estivo a de ser depositarios e salvagardas dun dos Bens de Interese Cultural máis destacados da nosa comunidade, a Colección de arte, que mostramos a través de proxectos expositivos de moi variada temática e linguaxe.
Para conmemorar os 10 anos de xestión deste BIC, presentamos SIMULTÁNEA, un macro proxecto que implica a Colección como elemento dinamizador da cultura e a tradición galegas nas súas sete cidades. Todas as sedes de Afundación implícanse nesta experiencia «simultánea», unha exhibición sen precedentes en que gozar dunha boa parte das máis de 5.000 pezas que compoñen o catálogo visual e histórico que é a nosa Colección de arte.
Instalacións, fotografía, escultura, pintura… para relatar a nosa historia contemporánea baixo o prisma da arte galega desde o século XIX á actualidade.
Ademais, presentamos toda unha gama de actividades relacionadas, destacando o programa de escolares en que se combinan coñecementos de arte e historia, actividades de robótica e programación con axuda da IA (Aula STEAM) e liñas de contido asociadas á sostibilidade e a conservación.
A nosa Colección abre as súas portas na cidade de Vigo a unha das temáticas artísticas capitais da pintura galega contemporánea: viaxamos ao mundo da fantasía.
Imaxes imposibles, soños, contos e lendas. Un canto ao imaxinario colectivo de marca galega, que pretende ser un punto de referencia para as e os escolares a través dun programa orientado a todas as idades e onde combinamos arte, programación e robótica, con creatividade e sostibilidade:
• Infantil a 4º Primaria | Visita-conto con obradoiro | O oráculo dos contos (90 minutos.)
Na sala escóndese un oráculo, mais… que é un oráculo? Por que din que é coma unha fonte? O oráculo dos relatos de Afundación é unha fonte inesgotable de contos, lendas e disparates. É tan, tan divertido, que quereremos atrapalo e telo para sempre.
(*) Visita híbrida específica para 3º e 4º Primaria.
• 5º Primaria a 2º ESO | Visita guiada adaptada con obradoiro | A grande evasión… da realidade
(2 horas.)
Realizamos unha comparativa entre a fantasía no mundo dos videoxogos e a arte para comprender que a fantasía, ese xeito de evasión, serviu durante séculos como forma de expresión e como resposta a un contexto histórico determinado. A IA axúdanos nesta ardua tarefa.
• 3º e 4º ESO, bacharelato e CF | Visita comentada con obradoiro opcional | Simultánea. Voar coa imaxinación na Colección de Arte Afundación (1 hora sen obradoiro. 2 horas con obradoiro)
A nosa sala de exposicións convértese nunha magnífica aula de arte e historia que nos permite coñecer o porqué do nacemento de formas de expresión asociadas á fantasía e relacionalo co contexto histórico que as viu nacer.
